Noticias
Fanse públicas as cinco composicións finalistas do II Concurso Manuel María de Composicións Musicais
15/07/2023
As composicións para voz e piano de Teo Montero Rey, Manuel Tizón Díaz, Brais González Pérez, Gerald David Vázquez Fernández e Xesús Xosé Iglesias González disputarán o primeiro premio na fase final que se celebrará en outubro na Casa-Museo Manuel María
A Casa-Museo Manuel María vén de facer pública a resolución do Xurado da 1ª fase da IIª edición do Concurso Manuel María de Composicións Musicais que ten por obxecto premiar a mellor canción lírica para voz e piano escrita sobre un poema de Manuel María.
As composicións escollidas polo xurado para pasar á fase final resultaron ser da autoría de Teo Montero Rey, Manuel Tizón Díaz, Brais González Pérez, Gerald David Vázquez Fernández e Xesús Xosé Iglesias González que foron realizadas sobre os poemas de Manuel María Tes un brillo amortecido, Baladiña do salouco confidente, Lembranza da lagoa de Cospeito, O meu barco, Falan uns campesiños aos que lles expropiaron as terras.
A canción gañadora determinarase entre estas finalistas para o que se levará a cabo un concerto público que terá lugar no Auditorio da Casa-Museo Manuel María nunha data que en breve se comunicará ao redor do aniversario do escritor.
O xurado estivo presidido por Margarita Viso Soto, compositora, pianista acompañante, editora de música e musicóloga, campo no que destacan os seus traballos sobre Marcial del Adalid e Baldomir. Premio da crítica galega en 2020. Como vocal participou Juan Durán Alonso, autor de obras de música de cámara, vocal, sinfónica e escénica, ademais de arranxos e orquestracións de música galega. Foi Premio da Cultura Galega en 2013 e Premio Reina Sofía de Composición en 2018. É membro da Real Academia Galega de Belas Artes e da M. I. Academia da Música Valenciana. Tamén como vocal formou parte Xosé Carlos Seráns Olveira, músico e compositor e o actual presidente da Asociación Galega de Compositores. É, ademais, xerente da Banda Municipal de Santiago de Compostela e persoa comprometida coa música galega dentro da que impulsou numerosos proxectos. Actuou de secretario, con voz e sen voto, Alberte Ansede, presidente da Fundación Manuel María.
O certame, convocado na súa segunda edición, conta cun premio en metálico de mil euros para a composición gañadora ao que hai que engadir a publicación das partituras das persoas finalistas e a súa distribución gratuíta a todos os Conservatorios de Música de Galiza.
Galería de fotos
Acta do xurado
(2023)
Acta do xurado
(2023)