Actividades

Miro Casabella, Uxía e Molime protagonizan a nova edición de Lúas de Outono

Miro Casabella, Uxía e Molime protagonizan a nova edición de Lúas de Outono

11/09/2019

O espectáculo será guiado por Xurxo Souto

O 25 de setembro, cuarta feira (mércores), ás 20:30, no Teatro Rosalía Castro, celébrase unha nova edición de Lúas de Outono, homenaxe anual a Manuel María, que se vén levando a cabo desde hai once anos na cidade da Coruña.

Para a edición deste ano, aproveitando que hai pouco foron os 50 anos do concerto que se coñeceu como de presentación da Nova Canción Galega, vai facerse un acto de recoñecemento aos cantautores e cantautoras galegas, parte fundamental da cultura de noso e tamén, figuras privilexiadas na difusión da nosa poesía. Aquel concerto histórico do Teatro Capitol de Compostela fora presentado por Manuel María quen, alén disto, a través do selo EDIGSA-XISTRAL, promoveu a difusión desta música en galego que supuña unha ruptura co folclorismo de cariz franquista por aquel momento.

Así nas Lúas de Outono deste ano haberá a oportunidade de escoitar tres voces que, de algún xeito, son mostra de xeracións diferentes e tamén de diversos estilos: MIRO CASABELLA ;UXÍA, acompañada por Santi Cribeiro e Sérgio Tannus; e a voz de Xoán Padín, que xunto Alberte Núñez, Alberto Maceiras e Gumer Freire, conforman MOLIME. O espectáculo será guiado por Xurxo Souto.

A entrada é libre até completar o aforo.