Actividades

Caxoto, cos seus Grandes Éxitos, este sábado na Casa-Museo Manuel María

O contador de Cervo celebra 20 anos enriba dos escenarios cun espectáculo de narración oral e musical para crianzas entre 4 e 10 anos

Caxoto, co seu espectáculo Grandes Éxitos (2004-2024), estará este próximo sábado, día 9 de marzo, ás 17 h, na Casa-Museo Manuel María, en Outeiro de Rei. O contador de Cervo celebra 20 anos enriba dos escenarios con este espectáculo de narración oral e musical dirixido para crianzas de entre 4 e 10 anos.

Durante todos estes anos o principal ingrediente do seu traballo foron os contos, mais as cantigas tradicionais, os xogos musicados, os instrumentos peculiares... tamén fixeron parte dos seus espectáculos. Caxoto xunta, agora, todo, nun amplo repertorio musical que vai desde o jazz chairego de Manuel María, á bossa nova mariñeira, pasando pola rica tradición musical e as cantigas infantís de toda a vida. E todo co mellor acompañamento musical posíbel: gaita, pandeireta, ukelele, whistle, acordeón, birimbao, xilófono... Por tanto, o sábado celebrará este aniversario de vivir do conto cunha selección de todos eses contos, cancións e xogos nos seus Grandes Éxitos.

Para asistir ao espectáculo é necesario reservar (billete 2 euros) en contacto@casamuseomanuelmaria.gal ou no whatsapp 698177621.